Thursday, June 26, 2014

رمضان حلو...رمضان كريم

إجا رمضان وبلشت الذكريات تخطر عبالنا. ما بعرف شو بصير. كل الذكريات بيجو سوا. ذكريات قديمة، حلوة ومرّة.

أحلى ذكريات رمضان هي إيام الصليب الأحمر والافطارات يلي كنا ننظما. كنا كلنا نبقى شي ساعتين بعد الافطار بلا أكل لحد ما نتأكد إنو كل الناس والولاد أكلو وتحلّو ولعبو كمان. وكنا نمرّق لبعض تمر ومي ناكلن عل سريع ونرجع دغري على الشغل. وبعد ما نخلص نجتمع كلنا سوا على الافطار المأخر. رزق الله.

إجا رمضان وإجت العجقة بالمنطقة. أحاديث النسوان عن طبخة اليوم والفتوش والرقاقات وإذا فيّقوا الولاد على السحور. والشباب عم بتصرّخ لبعضا: "شو كيف الصيام معك؟". وضجة وزمامير وروايح الأكل والحلو. عجقة مش طبيعية ما بتحس فيا إلا إذا كنت عايش بمنطقة شعبية. وكل ما اكبر كل ما عم حبّا أكتر.

إجا رمضان وإجت العجقة بالبيت على الافطار والركض من المطبخ لقوضة الأكل كأنو في شي عزيمة مهمة وكل شي منيح بس ما تنسى شي غرض. عجقة يمكن بتوجعلك راسك لمّا تكون صايم بس ما فيك ما تحبّا لما تعرف أدي في ناس محرومين منا.

إجا رمضان وإجت صلاة التراويح. ومنظر الناس يلي عم تركض بعد صلاة العشاء تتلحّق الشيخ. هيدي من أحلى الاشيا يلي بتشوفا.

إجا رمضان وإجت المعايدات من الناس يلي صرلك زمان ما حكيتن. وأحلى معايدة بتكون من رفقاتي يلي مش مسلمين وعلى فكرة هن أول ناس بعايدوني عادةً: "رمضان كريم سوس"، صيام مقبول يا سوس"، "ينعاد عليك وعلى أهلك"...طب في أحلى من هيك؟ ايه في! لما يصيرو يسألوك عن عوايد رمضان أو لما يطلبو منك عزيمة علافطار لأنو كتير عبالن يشوفو شو بصير.

كل شي حلو برمضان، قربنا من الله كتير حلو، و قربنا من الناس يلي بحاجة لالنا كتير حلو ولك حتى جوعنا حلو، وعطشنا حلو.

بس في شغلتين بضايقوني برمضان: الناس الفقراء والناس الوحيدة.
الفقراء بينطرو الناس تياكلو آخر النهار وبالليل، وحدو ايمانون بانو "رمضان كريم والله أكرم" بيساعد عيونن تتنام وقلوبن تتطمن انو أكيد بكرا الأكل لح يتدبر.

ويلي وحيد متل يلي ما إلو حدا،  أو ترك بلدو وبيتو وأهلو، بتبقى حرقة الوحدة بقلبو ولو معو مصاري كتير وقادر ياكل أطيب أكل. بس مع كل لقمي بيغص على السّكت وما في ما يتذكر رفقاتو وجمعتن برمضان. ما في ما يتذكر شارع البيت والعجقة. ما في ما يتذكر الجامع يلي كان يصلي في ويلي ما بيعرف إذا بعدو أو راح. ولا في ما يتذكر عجقة البيت و ريحة طبخ إمو.

أكيد لح ادعي هي السنة إنو ينعاد رمضان علينا والله يتقبل صيامنا ويغفر ذنوبنا ويشيل من قلوبنا الحقد والوجع يلي فينا بس كمان لح ادعي إنو الله يشيل من قلوب كل الناس غصة الفقر وغصة الوحدة البشعة. لأنو الوحدة أوقات أصعب من الفقر.

 رمضان حلو... رمضان كريم والله أكرم بكتير!




الصورة لقسم الشباب في الصليب الأحمر (فرع سبيرز) في إحدى افطارات رمضان